|
|
|
|
Dhinacyada is-khilaafsan
ee Isbaheysiga Dib u xoreynta Soomaaliya oo maanta isku soo
hor-fariisanaya Dalka Yemen |
|
|
Dhinacyada is-khilaafsan ee Isbaheysiga Dib u xoreynta
Soomaaliya ayaa maanta waxay isku soo hor-fariisanayaan
Magaalada Sanca ee Dalka Yemen, iyadoo labada dhinacna ay ka
wada hadlayaan khilaafaad soo kala dhexgalay.
Daahir Maxamuud Geelle oo ka mid ah Xubnaha Isbaheysiga Dib u
xoreynta ee fadhigoodu yahay Dalka Jibouti ayaa wuxuu sheegay
in guddiyo labada dhinac kala metelaya oo heer Maxkamadihii
Islaamka ah ay maanta isku horfariisan doonaan Magaalada Sanca
ee Dalka Yemen, wuxuuna sheegay in ay labada dhinac ka wada
hadli doonaan waxyaabihii keenay in uu Isbaheysiga kala fikir
noqdo.
Daahir Maxamuud Geelle waxaa uu rajeeyay in marka ay labada
dhinac ka doodaan waxyaabihii la isku qabtay in ugu dambeynta
la is-qancin doono, wuxuuna caddeeyay in mar kastaba ay labada
dhinac doonayaan sidii Soomaaliya looga saari lahaa Ciidamada
Itoobiya.
Xubnaha Shirka maanta ka qeybgelayaa ayaa waxay kala kala
yimaadeen Dalalka Jibouti iyo Eritrea oo fariisin u kala ah
dhinacyada uu u kala baxay Isbaheysiga Dib u xoreynta, waxaana
lagu soo waramayaa in ay labada dhinac dhexdhexaadinayaan
xubno ka tirsan Maxkamadihii Islaamka oo ka tegay Gudaha iyo
Dibadda Soomaaliya.
Isbaheysiga Dib u xoreynta Soomaaliya oo lagu aas-aasay dalka
Eritrea ayaa wuxuu labo qeybood u kala jabay kadib markii
mas’uuliyiinta sare ee Isbaheysiga iyo xubno ku fikir ah ay
aqbaleen in ay ka qeybgalaan wada hadallo ay Qaramada Midoobay
soo qaabeysay, kuwaasi oo lagu dhexdhexaadinayo Dowladda
Federaalka iyo Isbaheysiga dib u xoreynta Soomaaliya.
Waxaa la eegayaa waxa ka soo baxa kulanka maanta Magaalada
Sanca uga furmaya Dhinacyada Isbaheysiga Dib u xoreynta
Soomaaliya, kuwaasi oo la rumeysan yahay in xal loo helo
khilaafka soo kala dhexgalay uu wax weyn ku soo kordhin karo
geeddi socodka nabadeynta Soomaaliya.
HOE source
|
|
|
|
|
| |
|
|
|
