|
|
|
|
Warsaxaafadeed Madaxtooyada
SOMALILAND |
|
|
Madaxtooyada SOMALILAND
Date: 07/07/2008
Warsaxaafadeed
Madaxweynaha Jamhuuriyada Somaliland Mudane Daahir Rayaale
Kaahin waxa uu Maanta qasriga Madaxtooyada ku qaabilay Wefdi
Ka Socda Deeq bixiyayaasha Ururka Isbahaysiga Yurub ee EU ee
Somaliland ka taageeraya Doorashooyinka iyo Diiwaan gelinta
Codbixiyayaasha.
Wefdigaasi oo uu hogaaminayay Mr Richard Hands, waxa ay
booqasho gaaban oo dhawr maalmood ah ku soo gaadheen
Somaliland , si ay u kuur galaan xaaladda siyaasadeed ee dalka
iyo u diyaar garowga doorashooyinka dalka ku soo food leh.
Mudane Richard Hands hadal kooban oo uu kulankaasi ka jeediyay
waxa uu ugu mahad naqay xukuumada uu hogaamiyo Madaxweyne
Daahir Rayaale Kaahin , Asxaabta Qaranka iyo Guddida
Doorashooyinka Qaranka sidii ay u soo afjareen khilaafkii ka
taagnaa arrimaha la xidhiidha Doorashooyinka , waxana uu ku
amaanay tallaabooyinka ay Somaliland ka qaaday taas oo looga
bartay mar kasta in ay Somaliland ku xaliso khilaafkeeda si
wada tashi iyo is afgarad ah.
Mudane Hands waxa kale oo uu sheegay in ururka Barwaaqo
Sooranka ee EU-da iyo dalalka kale ee deeq bixiyayaashuba ay
la diyaar yihiin taageeradii dhinaca dhaqaalaha oo ay ku bixin
lahaayeen Diiwaan gelinta Codbixiyayaasha iyo Doorashooyinka
Madaxtooyada iyo Golayaasha Deegaanka ee dalka ku soo fool leh,
waxana uu ku tilmaamay in arrintaasi ay tahay arrin culus oo
looga baahan yahay in Somaliland ay si qurux badan uga
dabaalato , una ansixiso si nabad gelyo iyo xasilooni ah.
Madaxweynaha Somaliland Mudane Daahir Rayaale Kaahin oo isna
kulankaasi si kooban uga hadlay waxa uu ugu mahad naqay
wadamada deeq bixiyayaasha oo ay ugu horeyso ururka Barwaaqo
Sooranka EU-da taageerada buuxda ee ay ka siinayso sidii ay u
qabsoomi lahaayeen Diiwaan gelinta ku saabsan dhinaca
doorashooyinka ee loo samayn doono muwaadniinta reer
Somaliland ,taas oo ah mid aan dalka hore looga samaynin ,
kuna cusub
Madaxweynuhu waxa kale oo uu ballan qaaday in xukuumadiisu ay
gacan buuxda ka siin doonto dhamaan hay’adaha ku shaqada leh
diiwaan gelinta codbixiyayaasha iyo doorashooyinkaba , si ay
dalka uga dhacaan doorashooyin xor ah oo xalaala.
Mudane Rayaale waxa kale oo uu tibaaxay in ay sidii looga
bartay Somaliland mar kasta ay diyaar u tahay in ay iyadu
dhamaysato wixii khilaafaad ah ama carqalad ah ee la soo
gudboonaada , iyada oo aan cid kale la kaashan, waxana uu
sheegay in sida ugu dhakhsaha badan loo dar dar gelin doono
laamihii shaqada ku lahaa diiwaan gelinta codbixiyayaasha oo
ay ka mid tahay Wasaarada Arrimaha Gudaha iyo Guddiyada
Xukuumada , Komishanka Doorashooyinka iyo Asxaabta Qaranku ay
wadaagaan.
Wefdigaasi deeq bixiyayaasha caalamiga ah ee EU-da oo dhawr
maalmood ku sugnaa Somaliland , waxa ay fadhiyo gooni gooni ah
la yeesheen dhawrkii maalmood ee ina dhaafay Madaxda Asxaabta
Qaranka , Shirgudoonada Labada Gole ee Wakiilada iyo Guurtida
iyo Guddida Doorashooyinka. Kulankaasi waxa kale oo goob joog
ka ahaa Wasiirul dawlaha Wasaaradda Arrimaha Dibada Mudane
Siciid Maxamed Nuur.
Alla Mahad leh
Siciid Cadaani Mooge
Af-hayeenka Madaxtooyada JSL
JOH Source
|
|
|
|
|
| |
|
|
|
