|
Salaadiinta Awdal oo
Qaadacay in Diiwaangelin Laga Qabto Gobolkooda |
|
|
Boorama (DSN) Salaadiinta reer Awdal, ayaa shaaca
ka qaaday in aanay oggolaan doonin in gobolkooda laga sameeyo
diiwaangelinta codbixiyeyaasha doorashooyinka soo fool leh.
Sidaana waxa ay kaga dhawaaqeen shir-jaraa’id oo ay xubno ka
mid ah madax-dhaqameedyada Gobolka Awdal shalay ku qabteen
hoteelka Rays ee magaalada Boorama.
Waxa kale oo Salaadiintu shirkooda jaraa’id markii ugu
horreysay si cad uga hadleen aragtidooda ku wajahan
mudaharaadkii rabshadaha watay ee Isniintii toddobaadkii hore
ka dhacay magaalada Hargeysa, kaas oo saddex qof ku dhinteen,
12 kalena ku dhaawacmeen, kuwaas oo ka dhashay dhashay riig
ceel biyood ka qodayey koonfurta Hargeysa oo xukuumaddu isku
dayday inay u wareejiso degaanno kale, iyada oo ay
mudaharaadayaashu ku doodayeen in loo waday magaalada Boorama,
inkasta oo xukuumaddu sheegtay in loo waday degaanka Gabiley.
Suldaan Cabdiraxmaan Jaamac Dhawal oo ugu horreyn shirkaa
jaraa’id ka hadlay, ayaa dhacdadaa ku tilmaamay mid
nasiib-darro ah, isaga oo ka tacsiyadeeyey dadkii rabshadahaas
dhibaatadu ka soo gaadhay, gaar ahaan qoysaskii ay ka baxeen
dhallinyaradii geeriyooday iyo kuwa ku dhaawacmayba.
Suldaanku waxa kale oo uu eedaymo u jeediyey salaadiin iyo
siyaasiyiin ka hadlay dhacdadan oo uu sheegay inay
hadalladooda ka muuqdeen waxyaabo dhaawac ku keeni kara
midnimada iyo wadajirka ummadda Somaliland, "Waxa xusid mudan
inkasta oo beelo la kala yahay sida aynu kala midka nahay
Soomaalida kale. Ururkii SNM markuu dalka soo galay ciddii
nabadda keentay waxay ahaayeen dadka halkan [Gobolka Awdal]
dega, waayo haddii wakhtigaa loo arki lahaa beel waddan
qabsatay, xaaladduna intan way ka sii xumaan lahayd, fidnaduna
way sii ballaadhan lahayd, sidaa awgeed waxaan ku talin lahaa
in la dhawro midnimada iyo wadajirka ummadda, aniga oo daba
socda salaadiin iyo rag siyaasiyiin ah oo dhacdadan ka yidhi
erayo xanaf leh, halkii ay ka ahayd inay u caqli celiyaan
dhallinyarada," ayuu yidhi Suldaan Dhawal.
Isaga oo ka hadlay sababaha shaqaaqadan dhaliyay, waxa uu
sheegay in xukuumadda lafteedu ay dhaliilo ku yeelan karto,
balse uu qallooca u weyni ka yimi odayaasha iyo xildhibaannada
deegaanka koonfurta Hargeysa oo uu sheegay in taladu ka
qalloocatay loona baahnaa in aanu arinkani gacmahooda dhaafin.
Suldaan Cabdiraxmaan Dhawal isagoo arrimahaa faahfaahinayeyna
waxa uu yidhi; "Mucaarid iyo muxaafidba cidda lala hadlayo waa
in dhaliishooda loo sheegaa. Waxa ay wararku nagu soo gaadheen
in ceelasha riiggu hore ugu jiray biyo laga helay, balse loo
baahday qalab riigga ka maqan, markaa haddii tabasho timi waxa
habboonayd in salaadiinta, wasiirrada iyo xildhibaannada
degaankaasi ay xukuumadda kala hadlaan una soo bandhigaan,
balse waxa dhacday in arrintii iyaga dhaaftay oo u gudubtay
shacabka. Xukuumadda lafteedu ma dhaliil la'a ee wixii ka
khaldan ha saxaan, waxaanan leeyahay idinkaa ummadda ka masuul
ah ee marwalba gacantiinu ha laabnaato, una tudha shacabkiina
tamarta darran. Salaadiintu waa garsoor, ummaddana waa u dhex,
waana ta nagu khasbaysa in aanaan ummadda kala xigtaysan, mana
aha inay ummadda kala xigtaystaan, mana aha in suldaan raali
ka noqdo in nabadda wax la yeelo, lana dhaawaco sumacadda ay
Somaliland caalamka ka kasbatay."
Geesta kale, Suldaan Dhawal oo ka hadlayey diyaargarowga
hawsha diiwaangelinta codbixiyeyaasha, waxa uu daboolka ka
qaaday inaanay ka salaadiin ahaan oggolaan doonin in
gobolkooda laga bilaabo diiwaangalinta, balse faahfaahin kama
bixin sababta ay ku diidan yihiin in diiwaangelin laga qabto
Gobolka Awdal. Waxa kale oo uu xukuumadda u soo jeediyay inay
wax u qabtaan dadka beeralayda ah oo laba dallag beerasho ay
ka baabi'isay diirta ku hasbatay, dadkuna aanay waqtigan
awoodin tamar ay mar saddexaad beerahooda ku shinniyeystaan,
maadaama xoolihiina abaaruhu ka dhammeeyeen, inta u hadhayna
aanay u iibgelayn, sidaa awgeed waxa uu xukuumadda ku adkeeyay
inay dadkaa si degdeg ah wax ugu qabato, haddii kale loo arki
doono inay ummaddeedii iyadu dayacday."
Suldaan Xasan Xaddi Baade oo isna halkaa ka hadlay ayaa yidhi;
"Annaga oo aad uga xun kana murugoonayna dhacdada mudaharaadka
ee dadna innaga dhinteen qaarna innagaga dhaawacmeen, haddana
waxa lagama maarmaan ah in wax la is xasuusiyo, waayo waxaad
moodaa inay dhacdadaasi u muuqaal ekaatay arrin dib-u-dhac,
kala qoqobnaan iyo gobolaysi innagu keeni karta, waxaanan ku
talinayaa in laga waantoobo waxyaabaha ummadda dareenkooda
kala fogayn kara."
"Wax waa la tirsan karaa, waase in dariiqeeda loo maro,
waxaana salaamayaa siyaasiyiinta, maamulka iyo salaadiinta
intooda sida wanaagsan u socoto, inta kalena Ilaahay ha soo
haddeeyo, waxana habboon cidda hadlaysaa inay ka fikirto oo ku
hadasho wax ummadda wax u taraya, mana aha inuu dhibaato
abuuro," ayuu yidhi suldaan Baade.
Jamhuuriya Source
|
|
|
|
|
| |
|
