|
|
|
|
Warshadda
Furshaanta ee Al-Kheyraad oo mar Labaad Gubatay |
|
|
Hargeysa (DSN) Warshada furshaanta ee Al kheyraad ayaa shallay
gelinkii danbe abaaro 5:00 uu dab qabsaday kaasi oo soo
gaadhsiiyay khasaare aan ilaa imika la garanayn inta uu le’eg
yahay. Dabkan warshada qabsaday ayaa ku soo beegmay wakhti ay
shaqaalaha warshada badankoodu ay ka rawaxeen. Qaar ka mid ah
shaqaalaha oo aanu halkaasi kula kulanay ayaa ka gaabsaday in
ay faah faahin naga siiyaan sababta dabka dhalisay. Dhinaca
kale, Taliyaha ku xigeenka rugta Police-ka xaafada Max’ed
Mooge ee Caasimada Hargeysa Cabdi Cumar Askar, oo aanu
halkaasi kula kulanay ayaa sheegay in ay wali baadhayaan
sababta dabka dhalisay. Khasaaraha warshada soo gaadhay ayaa
ah: Jiingadii sare ee dhismaha oo gabi ahaanba gubatay iyo
agab tiro badan oo hoos yaalay oo iyaguna gubtay. Hasa yeeshee,
khasaaraha dhabta ah ilaa imika lama oga.
Waxa ka qayb qaatay bakhtiinta warshada Booyadaha Biyaha ee
Xaafada Max’ed Mooge oo warshadu ay ku taalo, Dadwaynaha
xaafadaasi degen iyo askarta rugta police-ka ee xaafadaasi.
Ilaa imika lama oga sababta dhabta ah ee dhalisay khasaaraha
warshada.
Waa markii labaad ee warshadaasi uu dab qabsado tan iyo
mudadii ay jirtay, iyada oo markii hore oo ku beegnayd
sanadkii hore, khasaaraha dab ee soo gaadhay uu ahaa mid
dhulka la simay gabi ahaanba wixii agab warshada yaalay
taasina ay sababtay In warshada uu soo gaadho khasaare laxaad
leh oo ay baaxadiisu aad u wayn tahay.
|
|
|
|
|
| |
|
|
|
